Cafodd y wefan hon ei chreu i gynnig cyngor ymarferol ynghylch cyflawni eich rhwymedigaethau ‘Dyletswydd Gofal’ dan Adran 34 Deddf Diogelu’r Amgylchedd 1990.[1]

Dylech roi sylw i hyn. Mae’r rheoliadau amgylcheddol yn datgan bod pob sefydliad neu fusnes sy’n cynhyrchu gwastraff, ble bynnag y mae wedi’i leoli, yn gyfrifol am reoli’r gwastraff hwnnw’n iawn.

Hynny yw, chi!

Os nad ydych yn gwneud hynny, am ba reswm bynnag, mae perygl y bydd eich sefydliad neu fusnes yn cael ei erlyn, a gallech orfod talu dirwy os cewch eich canfod yn euog yn y llys. [2] 

Mae ymchwil ddiweddar yn awgrymu mai cwmnïau bach a chanolig eu maint, gyda rhwng 0 a 50 o weithwyr, yw 90% o’r cyrff hynny sy’n torri’r gyfraith ar hyn o bryd. [3]

Y prif reswm am hyn yw oherwydd nad ydynt yn gwybod beth mae angen i’w sefydliad neu eu busnes ei wneud er mwyn cydymffurfio’n llawn â’i rwymedigaethau dyletswydd gofal.

Os yw hynny’n wir amdanoch chi, bydd y wefan hon yn gymorth ichi ddeall mwy am eich rhwymedigaethau Dyletswydd Gofal. Bydd, yn llythrennol felly, yn eich cynorthwyo i roi’r gwastraff iawn yn y lle iawn, fel y gallwch sicrhau eich bod yn cydymffurfio, a hynny â chyn lleied o ffwdan â phosibl. Nod y wybodaeth ar y wefan hon yw bod yn ymarferol ac yn ddefnyddiol; er enghraifft, rydym wedi cynnwys cardiau Angen Gwybod syml am eitemau cyffredin sy’n cael eu gwaredu fel gwastraff, gan roi cyngor chwim ar sut i gael gwared arnynt.  

Ar y wefan hon fe gewch hefyd fideos perthnasol, astudiaethau achos, cyflwyniad syml ar sut i gydymffurfio, cwestiynau ac atebion manwl a llawer o ddolenni defnyddiol er mwyn ateb cwestiynau mwy penodol neu fanwl. 

Ac os na allwn eich cynorthwyo, fe’ch rhoddwn mewn cysylltiad â rhywun all wneud hynny.